Áramótaheit ferðafrömuðarins < Origo

 
 

Áramótaheit ferðafrömuðarins

12.01.2017

Í byrjun nýs árs er gott fyrir ferðafrömuði að rýna árið framundan. Samkvæmt farþegaspá Isavia fyrir árið 2017 munu erlendir farþegar verða um 2.241 þúsund, sem er fjölgun um 24,7% á milli ára. Er vefurinn þinn tilbúinn?

1. Er vefurinn nógu hraður?

Þolinmæði notenda fer stöðugt minnkandi. 40% kaupenda fara annað ef þeir þurfa að bíða lengur en í 3 sekúndur eftir því að vefurinn hlaðist upp. Auk þess sem einn af hverjum tveimur notendum ætlast til þess að vefsíða hlaðist upp á innan við 2 sekúndum.

Samkvæmt rannsóknum Google frá september 2016 þá voru vefir að meðaltali 19 sekúndur að hlaðast upp í snjallsíma með 3G tengingu en 77% vefja voru lengur en 10 sekúndur að hlaðast upp. Það er því ljóst að hægt er að gera mun betur í þessum málum.

2. Er vefurinn öruggur?

Https er málið árið 2017. Í janúar byrjaði Google Chrome (útg. 56) að merkja allar http síður í vefslóðarreitnum (e. "address bar") sem ótraustar (e. "non-secure"). Með þessari merkingu vill Google gera notendur enn meðvitaðri um öryggi á vefnum þar sem http síður tryggja ekki öryggi gagna.

En https síður eru ekki bara öruggari, þær eru líka hraðari og geta notað nýjustu viðbæturnar sem í boði eru í vafranum.

3. Svara leitarniðurstöður vefsins spurningum notenda?

Þegar notendur vilja vita, fara, gera eða kaupa (e. “micro-moments”) þá taka þeir upp snjallsímana og leita að svarinu. Það er því mikilvægt að búið sé að greina hvaða verkefni (e. “top tasks”) notendur eru komnir inn á vefinn til að leysa. Þegar leitarniðurstöður svara spurningum notenda eru þeir fljótari að taka ákvarðanir en 60% notenda telja að viðeigandi leitarniðurstöður geri þeim kleift að ákveða sig fyrr.

4. Virkar vefurinn þinn í snjallsíma?

Í fyrra uppfærði Google reiknirit (e. “algorithms”) sín svo að leitarniðurstöður í snjallsímum gæfu skalanlegum vefjum aukið vægi. Þessi breyting var gerð til að tryggja notendum leitarniðurstöður sem væru bestaðar fyrir snjallsíma. Vefir sem virka ekki í snjallsímum eru því ekki eins sýnilegir í leitarniðurstöðum Google.

Hvernig kemur vefurinn þinn út?

Vilt þú vita stöðuna á vefnum þínum? Farðu á testmysite.thinkwithgoogle.com og athugaðu málið.

Niðurstöðurnar sýna:

  • Hversu vel vefurinn hentar snjallsímum (e. “mobile-friendliness”).
  • Hraða vefsins er í snjallsíma (e. “mobile speed”).
  • Hraða vefsins í borðtölvu (e. “desktop speed”).

Google gefur hverju atriði einkunn á bilinu 0 til 100 auk þess sem talið er upp hvað er að virka vel og hvað illa á vefnum. Einnig er hægt er að fá ókeypis skýrslu senda í tölvupósti með nákvæmari lýsingum á því sem betur má fara.

Við hvetjum alla ferðafrömuði til að athuga stöðuna á vefjum sínum en 70% ferðamanna leita að ferðatengdum upplýsingum í snjallsímunum sínum. 

Lesa meira: Skipuleggja ferðalagið í snjallsímanum