heilsuvera.is besti íslenski vefurinn < Origo

 
 

heilsuvera.is besti íslenski vefurinn

31.01.2015

Vefurinn heilsuvera.is var valinn besti íslenski vefurinn á Íslensku vefverðlaununum 2014 sem fram fóru í Gamla bíó 30. janúar.

TM Software þakkar kærlega sýndan heiður og óskar öðrum vinningshöfum til hamingju.

Íslensku vefverðlaunin hafa verið veitt árlega frá árinu 2000 en markmið þeirra er að verðlauna framúrskarandi verkefni og um leið efla og hvetja þá sem starfa í vefiðnaðinum.

Ummæli dómnefndar

Fyrsta stefna ríkisstjórnar Íslands um rafræna stjórnsýslu kom út árið 1996 og frá þeim tíma hafa alls verið gefnar út fjórar stefnur. Mikið hefur verið talað um að þeim stefnum hafi ekki verið fylgt nægilega vel eftir og spurningar hafa vaknað um hvort við séum að dragast aftur úr nágrannaþjóðum okkar þegar kemur að þessum efnum.

Með tilkomu rafræna skilríkja hefur opnast nýr heimur tækifæra og hefur árið 2014 verið tími umbyltinga þegar kemur að rafrænni þjónustu á íslandi.

Besti íslenski vefurinn árið 2014 er sérlega glæsilegt verkefni sem fellur undir þennan flokk. Það hefur skapað sérstöðu með rafrænum samskiptum og öruggum aðgangi að viðkvæmum upplýsingum með rafrænni auðkenningu, sem býður upp á nýja möguleika á útfærslum fyrir hugmyndir sem hafa legið í hugum manna árum saman.

Dómnefndinni þótti þetta verkefni sérstaklega skara framúr í þessu samhengi og vonum við að þessu verkefni verði fylgt eftir á öllum sviðum stjórnsýslunar í þeim tilgangi að auka þægindi og lífsgæði allra landsmanna. Við erum með sannri ánægu stolt að viðurkenna og verðlauna þetta verk sem kemur til með að veita Íslendingum nýja yfirsýn og áður óþekkt þægindi í samskiptum við heilbrigðisþjónustu á Íslandi.

Þetta er auðvitað heilsuvera.is, samstarfsverkefni TM Software, Embættis landlæknis og Heilsugæslu höfuðborgarsvæðisins.

heilsuvera.is

Á vefnum heilsuvera.is getur hver notandi, á einfaldan og öruggan hátt, átt í samskiptum við heilbrigðisþjónustuna og nálgast þau gögn sem skráð eru um hann í heilbrigðiskerfið á Íslandi.

Hver notandi getur m.a.:

  • Skoðað gögn úr eigin sjúkraskrá.
  • Skoðað bólusetningaskrána.
  • Óskað eftir endurnýjun lyfseðla.
  • Bókað tíma hjá heilsugæslunni.

Vefurinn gefur almenningi örugga leið til að eiga í samskiptum við heilbrigðisþjónustuna en hver og einn skráir sig inn á vefinn með rafrænum skilríkjum.