Uppfærslur vegna Meltdown og Spectre < Origo

 
 

Uppfærslur vegna Meltdown og Spectre

09.01.2018

*Færslan hefur verið uppfærð neðst

Það eru fjölmargar spurningar sem vakna vegna öryggisgalla sem kom upp á dögunum hjá örgjörva framleiðendum sem kallast Meltdown og Spectre. Í þessum tilfellum liggur veikleikinn og vandamálið sjálft í hönnun örgjörva og svo stýrikerfa.

Margir framleiðendur eru þegar búnir að gefa út uppfærslur en þó ekki allir og þess vegna er mikilvægt að fylgjast vel með áfram, bæði á netþjónum og að sjálfsögðu PC vélum einnig.

Ekki verður farið ítarlega í vandamálið hér enda margir fréttamiðlar og aðrir búnir að vera að fjalla um vandamálið í nokkurn tíma.

Vandamálið þarf að lagfæra á mörgum vígstöðum og sumt af því þarf að gerast í réttri röð og til að tryggja öryggi þarf að uppfæra bæði stýrikerfi og vélbúnað (e. firmware). Origo hefur unnið að uppfærslum frá fyrsta degi og sú reynsla var notuð í að að koma með eftirfaradi ráðleggingar hvernig sé best að haga röð uppfærsla.

  1. Fyrst uppfæra vírusvörn í útgáfu sem styður breytinguna
  2. Síðan keyra inn stýrikerfisuppfærslur og virkja varnir eftir þörfum
  3. Loks uppfæra Firmware frá vélbúnaðarframleiðanda

Athugið að stýrikerfisuppfærslurnar (Windows) fara ekki rétt inn ef að þær eru settar inn áður en vírusvörn er uppfærð í studda útgáfu. Einnig er þekkt að Windows geti komið með „bluescreen“ og bilanir komið fram ef að uppfærslan er neydd inn í stýrikerfið áður en vírusvörnin styður hana.

Origo vill benda á að þó að vissulega sé um að ræða alvarlegan veikleika sem getur haft slæmar afleiðingar í för með sér þá er samt ekki til staðfest tilfelli í heiminum um innbrot sem nýtir sér viðkomandi veikleika né sé til þekkt leið til að framkvæma hann í raun kerfum. Það gæti þó vissulega breyst.

Öll dæmi um framkvæmd þessara veikleika og staðfesting tilvist þeirra voru framkvæmdir í lokuðum umhverfum.

Við viljum samt ítreka fyrir öllum að sýna varkárni og gæta þess að uppfæra tölvubúnað sinn um leið og þess gefst kostur og fylgja leiðbeiningum framleiðenda. 

*Microsoft hefur tímabundið stoppað dreyfingu á Windows 10 uppfærslum í tölvur með ákveðna AMD örgjörva þar sem að galli hefur komið upp sem að veldur að tölvur með viðkomandi AMD örgjörvum ræsa sig ekki eðlilega eftir uppfærslu.