Frá greiningu til úrbóta: Hvernig Origo brást við nýlegum veikleikum

Þegar veikleikar koma upp skiptir viðbragðsgeta máli. Nýlega komu fram nokkrir alvarlegir veikleikar í algengum PHP- og Node.js-einingum sem kölluðu á viðbrögð víða í tæknigeiranum. Hjá Origo var strax gripið til aðgerða.

Eftirlit, viðbragð og úrvinnsla 

Öryggisvöktun okkar greindi veikleikana fljótt og gaf skýra mynd af því hvar þá var að finna í umhverfi okkar: í eigin hugbúnaði, stýrikerfum og annarri þjónustu sem notar viðkomandi einingar.

Nálgun okkar er eftirfarandi:

1. Greina áhættuna 

2. Draga hratt úr henni

3. Fá rétt tæknifólk að borðinu 

4. Fylgja úrbótum eftir þar til þeim er lokið 

Öryggis-, rekstrar- og þróunarteymi okkar unnu þétt saman að því að meta hverja niðurstöðu og ákvarða hvar þyrfti að bregðast við. Þróunarteymi fengu strax tilkynningu um þann hugbúnað og þá þjónustu sem þau bera ábyrgð á. Rekstrarteymi fóru yfir stýrikerfi og gripu til mótvægisaðgerða þar sem þess var þörf. Í kjölfarið voru uppfærslur og öryggisplástrar settir upp og prófaðir til að tryggja að þjónusta héldi áfram að virka eins og til er ætlast.

Veikleiki í PHP eða Node.js getur leynst víða: í eigin hugbúnaðarþróun, hugbúnaði frá þriðja aðila, stýrikerfum og stoðinnviðum. Enginn einn hópur ber ábyrgð á slíku. Þess vegna leggjum við áherslu á að tengja öryggisniðurstöður hratt við það fólk sem þekkir og rekur hverja þjónustu, svo ákvarðanir og aðgerðir komist sem fyrst í réttar hendur.

Stöðug vöktun styrkir öryggi til framtíðar

Atvikið staðfesti gildi stöðugrar veikleikavöktunar og samhæfðra viðbragða. Að greina veikleika er aðeins fyrsta skrefið. Við leggjum jafn mikla áherslu á að skilja hvar hann er til staðar, finna ábyrgðaraðila, draga úr yfirvofandi áhættu, innleiða varanlegar lagfæringar og staðfesta árangurinn.

Veikleikar í tækni munu halda áfram að koma upp. Markmið okkar er að bæta stöðugt getu okkar til að greina, meta, samhæfa og draga úr öryggisáhættu í þjónustu okkar og hugbúnaði og að bregðast við af festu í hvert sinn.