Hvað er tækniskuld og hvers vegna skiptir hún máli?

Hvað er tækniskuld?

Tækniskuld verður til þegar tækni er ekki viðhaldið til lengri tíma. Hugtakið lýsir afleiðingum þess að velja fljótlegar og auðveldar lausnir fram yfir betri og heildrænni nálganir í tæknimálum. Ímyndaðu þér að þú standir frammi fyrir tveimur valkostum:

• Leið A tekur 3 mánuði og felur í sér að byggja trausta, skalanlega og vel hannaða lausn.

• Leið B tekur aðeins 1 mánuð en lausnin verður ekki jafn stöðug, erfiðara verður að bæta við virkni síðar og er viðkvæmari fyrir villum.

Undir tímapressu og með takmarkað fjármagn velja mörg fyrirtæki leið B - tekjurnar byrja að streyma fyrr inn, en tækniskuldin hefur þegar myndast.

Hvaðan kemur hugtakið?

Hugmyndin um tækniskuld var fyrst sett fram af forritaranum Ward Cunningham árið 1992, sem líkti slæmum hugbúnaðarkóða við fjárhagslega skuld. Síðan þá hefur hugtakið þróast og nær nú yfir mun víðara svið vandamála.

Hvernig myndast tækniskuld?

Tækniskuld myndast þegar fyrirtæki forgangsraða skyndilausnum, velja flýtileiðir í forritun eða hunsa viðhald á eldri kerfum. Þetta getur verið meðvituð ákvörðun til að ná ákveðinni tímasetningu, prófa nýjan markað eða halda kostnaði niðri, en getur líka gerst ómeðvitað þegar lítil ákvörðun verður að stóru vandamáli með tímanum.

Hvað á tækniskuld sameiginlegt með fjármálaskuld?

Eins og fjármálaskuld vex tækniskuld ef hún er ekki greidd niður, með "vöxtum" sem birtast meðal annars í:

• Auknum töfum á þróun nýrrar virkni

• Hærri viðhaldskostnaði

• Minni sveigjanleika til að bregðast við markaðsbreytingum

• Vaxandi flækjustigi sem gerir lausnina sífellt erfiðari í viðhaldi

Hugbúnaðurinn verður eins og gamall bíll. Þú getur haldið áfram að lappa upp á hann, en viðgerðirnar verða sífellt dýrari og tíðari og á endanum verður ódýrara að skipta honum út.

Að þekkja merkin

Hvernig veist þú hvort fyrirtækið þitt sé að glíma við tækniskuld? Hér eru nokkur skýr merki:

• Kerfi sem voru hröð í byrjun verða sífellt hægari með tímanum.

• Einfaldar breytingar sem ættu að taka klukkustundir taka nú daga eða vikur.

• Forritarar forðast að hreyfa við ákveðnum hlutum kóðans af ótta við að allt hrynji.

• Handvirk yfirfærsla gagna milli kerfa sem ættu að tala saman sjálfkrafa.

• Sömu villur koma ítrekað upp þrátt fyrir endurteknar tilraunir til lagfæringar.

Tækniskuld er algengari en þú heldur

Tækniskuld er ekki vandamál sem leysist af sjálfu sér. Í raun vex hún yfirleitt með tímanum ef ekkert er gert. Flest fyrirtæki, stór sem smá, standa frammi fyrir einhverskonar tækniskuld.

Gott er að átta sig á að þó tækniskuld virðist yfirþyrmandi, þá er hægt að losa sig úr henni með réttri nálgun. Fyrsta skrefið er að átta sig á að hún sé til staðar og skilja hvernig hún birtist í þínu fyrirtæki. Með skipulagðri nálgun er hægt að vinna sig smám saman úr tækniskuldinni og byggja upp skilvirkara og sveigjanlegra tækniumhverfi.