Linda Dögg útnefnd verðmætasti fagaðili hjá Microsoft

Fyrst íslenskra kvenna sem hlýtur nafnbótina

Linda Dögg Guðmundsdóttir, öryggis- og lausnaarkitekt hjá Origo hefur verið útnefnd sem MVP (e. Most Valuable Professional) hjá Microsoft. Linda er fyrst íslenskra kvenna sem hlýtur nafnbótina, en sex einstaklingar í tæknigeiranum á Íslandi bera þennan titil í dag. 

Microsoft MVP eru viðurkenningar sem Microsoft veitir leiðtogum í tæknigeiranum sem hafa lagt mikið af mörkum og sýnt fram á leiðtogahæfni, framúrskarandi hæfni á sínu sviði og frumkvæði til að miðla reynslu og þekkingu áfram í þjóðfélaginu. Viðurkenningarnar eru veittar í nokkrum flokkum og Linda Dögg var útnefnd í M365 Copilot flokknum.

Hún stofnaði meðal annars M365 hóp á Íslandi sem kemur saman mánaðarlega og fær fyrirlesara í heimsókn til að deila þekkingu sinni. Linda heldur einnig uppi vefsíðu, skrifar greinar og heldur reglulega fyrirlestra á Íslandi og erlendis. 

Eina leiðin til að verða Microsoft MVP er að verða tilnefndur af öðrum MVP eða af starfsmanni Microsoft. Þau sem eru tilnefnd þurfa að geta sýnt fram á hvað þau hafa lagt af mörkum í sínu nærsamfélagi yfir síðustu 12 mánuði.

MVP viðurkenningin veitir sérfræðingum eins og Lindu sterkari tengsl inn í Microsoft í Bandaríkjunum, meiri innsýn í hvað sé á döfinni og aukin áhrif á vöruþróun innan Microsoft. 

Linda Dögg Guðmundsdóttir

Keppnisskapið keyrði hana áfram

Linda segir að áhuginn á MVP samfélaginu hafi kviknað á Microsoft 365 ráðstefnu í Las Vegas fyrir tveimur árum. Hún varð heilluð af samfélaginu og kynntist nokkrum „MVP-um“ sem héldu fyrirlestra.