Maven og Datalab sameinast Origo undir einu merki

Origo hefur lokið samþættingu félaganna Maven og Datalab inn í starfsemi fyrirtækisins. Með þessu verða sérfræðingar félaganna hluti af teymum Origo og þjónusta þeirra framvegis veitt undir merkjum Origo.

Kaup Origo á Maven og Datalab er liður í að styrkja enn frekar stöðu fyrirtækisins á sviði stafrænnar umbreytingar, gagna og gervigreindar. Frá þeim tíma hefur verið unnið markvisst að samþættingu starfseminnar og hefur sú vinna nú verið kláruð.

Sterkara teymi með breiðari sérþekkingu

Samþættingin sameinar sérþekkingu og reynslu Maven á sviði gagna, gagnainnviða, gagnagreiningar og viðskiptagreindar við sterka stöðu Datalab í ráðgjöf og innleiðingu gervigreindarlausna. Með samþættingunni verður til enn öflugra þekkingarsamfélag innan Origo til að styðja fyrirtæki og stofnanir við umbreytingu á rekstri sínum með markvissri nýtingu gagna og gervigreindar.

Viðskiptavinir munu áfram njóta sömu sérþekkingar og þjónustu sem fyrr en jafnframt fá aðgang að víðtækara þjónustuframboði Origo. Með sameinuðum kröftum getur Origo nú boðið enn heildstæðari lausnir sem ná allt frá stefnumótun og ráðgjöf til hönnunar, innleiðingar og reksturs tæknilausna. 

Aukin geta til að leiða stafræna umbreytingu

Með því að verða hluti af Origo fá teymin enn sterkari grunn til að hjálpa fyrirtækjum að umbreyta gögnum í raunverulegt virði og nýta gervigreind á markvissan og ábyrgan hátt. Sameinuð búa teymin yfir einstakri breidd þekkingar sem mun nýtast viðskiptavinum.

Sérþekking sem byggð hefur verið upp í áratug

Samþætting Maven og Datalab inn í Origo markar jafnframt nýjan kafla í sögu tveggja fyrirtækja sem hafa haft umtalsverð áhrif á þróun gagna- og gervigreindarlausna hér á landi.

Datalab var stofnað árið 2016 og hefur frá upphafi verið meðal frumkvöðla á sviði gervigreindar á Íslandi. Fyrirtækið var eitt af fyrstu sérhæfðu ráðgjafarfyrirtækjum landsins á þessu sviði og hefur á undanförnum tíu árum unnið að fjölmörgum verkefnum fyrir fyrirtæki og stofnanir. Í mörgum tilfellum voru verkefnin meðal fyrstu skrefa íslenskra fyrirtækja í nýtingu gervigreindar og þannig hefur Datalab átt mikilvægan þátt í að ryðja brautina fyrir þá þróun sem við sjáum í dag.

Á sama hátt hefur Maven byggt upp sterka stöðu á sviði gagna, gagnainnviða og gagnadrifinnar ákvarðanatöku og hjálpað fjölmörgum fyrirtækjum að umbreyta gögnum í verðmæta innsýn og betri rekstrarákvarðanir.

Þar sem gögn, gervigreind og rekstur mætast

Undanfarin ár hefur eftirspurn eftir gagnadrifnum lausnum og hagnýtingu gervigreindar aukist hratt. Fyrirtæki leita í auknum mæli eftir samstarfsaðila sem getur tengt saman stefnu, gögn, tæknilausnir og rekstur. Með samþættingunni er Origo enn betur í stakk búið til að mæta þeirri þörf og styðja við viðskiptavini á öllum stigum stafrænnar umbreytingar.

Þótt starfsemi þessara félaga færist nú undir eitt vörumerki hverfur þessi sérþekking ekki. Þvert á móti. Fólkið, reynslan og þekkingin sem byggð hefur verið upp innan Maven og Datalab verður áfram kjarninn í þeirri þjónustu sem Origo veitir á sviði gagna, gervigreindar og stafrænnar umbreytingar.

Næsta skref í uppbyggingu Origo

Samþættingin markar næsta skref í uppbyggingu Origo sem leiðandi tæknifyrirtækis á Íslandi og styrkir enn frekar getu félagsins til að skapa viðskiptavinum verðmæti með gögnum, gervigreind og nýsköpun.