Stjórn Origo

Rakel Guðmundsdóttir

Formaður stjórnar frá mars 2024. Varastjórnarmaður frá 2023.

Rakel starfar sem eignarhaldsstjóri hjá Alfa Framtak sem rekur tvo framtakssjóði, AF1 og AF2. Sem eignarhaldsstjóri vinnur Rakel náið með stjórnendum þeirra félaga sem fjárfest er í að stefnumótun og fylgja eftir virðisaukandi aðgerðum á eignarhaldstíma.

Rakel býr yfir mikilli reynslu af rekstri og stjórnun fyrirtækja en hefur starfað á fjármálamarkaði frá árinu 2018. Hún hefur víðtæka reynslu af rekstri fyrirtækja, m.a. sem snýr að fjármálum, ferlum, hagræðingaraðgerðum, mannauðsmálum og breytingastjórn. Rakel situr í stjórn félaga á borð við INVIT og Reykjafell. Rakel er með B.Sc. í Rekstrarverkfræði frá Háskólanum í Reykjavík.

Gunnar Páll Tryggvason

Stjórnarmaður frá mars 2024.

Gunnar Páll er stofnandi og framkvæmdastjóri Alfa Framtak. Gunnar býr yfir 25 ára reynslu af framtaksfjárfestingum og fyrirtækjaráðgjöf. Hann hefur stýrt verkefnum í tíu löndum og setið í stjórnum fyrirtækja á borð við Refresco B.V., Hame S.r.o og Nordic Partners Ltd. Gunnar lauk MBA námi með láði frá Wharton Business School og námi í stjórnun frá Stanford. Hann hefur einnig lokið prófi í verðbréfaviðskiptum.

Árni Jón Pálsson

Stjórnarmaður frá mars 2023.

Árni Jón starfar sem fjárfestingastjóri hjá Alfa Framtak. Árni hefur starfað í tíu ár á fjármálamarkaði og vann m.a. í fyrirtækjaráðgjöf Icora Partners, þar sem hann vann að verkefnum á sviði fjármögnunar, endurskipulagningar og kaupum og sölu fyrirtækja. Árni hefur gegnt ýmsum stjórnarstörfum, þar á meðal hjá Heimavöllum og sem stjórnarformaður Borgarplasts og Málmsteypu Þorgríms Jónssonar. Áður starfaði hann hjá Arctica Finance og þar á undan hjá Landsbankanum.

Árni er með B.Sc gráðu í viðskiptafræði og fjármálaverkfræði frá Háskólanum í Reykjavík.

Bjarney Sonja Breidert

Stjórnarmaður frá mars 2023

Bjarney er einn stofnenda og eigenda 1xINTERNET, einni stærstu Drupal vefstofu í Evrópu en hún er einnig formaður stjórnar alþjóðlegu Drupal samtakanna, The Drupal Association. Bjarney á sæti í stjórn þýskíslenska verslunarráðsins og var um árabil fjárfestingarráðgjafi fyrir Brú Venture Capital og Thule Investments.

Bjarney er með B.Sc. í tölvunarfræði frá Háskólanum í Reykjavík og M.Sc. í Engineering Management frá Technical University í Vín.

Sigurður Valtýsson

Stjórnarmaður frá mars 2024. Varastjórnarmaður frá mars 2023.

Sigurður Valtýsson er framkvæmdastjóri Frigus Family Office og situr í fjölmörgum stjórnum innlendra félaga, Frigus, Frigus II, Frigus fjárfestingar og Svalt. Sigurður hefur verið í stjórn Mænuskaðastofnunar Íslands frá upphafi og sat í stjórn Samtaka banka of fjármálafyrirtækja. Auk þess er Sigurður fyrrum stjórnarformaður VÍS og Lýsingar (Lykils). Þá sat hann í stjórn Lánstraust (CreditInfo) og Öryggismiðstöðvarinnar og er fyrrum stjórnarmeðlimur í ýmsum dótturfélögum MP Fjárfestingarbanka auk Exista. Hann var annar af tveimur forstjórum Exista hf. og áður framkvæmdastjóri fyrirtækjasviðs og síðar forstjóri MP Fjárfestingarbanka. Þá var hann framkvæmdastjóri Tryggingarmiðstöðvarinnar hf. Sigurður er með BA próf í hagfræði og hefur hlotið löggildingu í verðbréfamiðlun.