Þróum áfram og breytum leiknum

Ofurhetjudagar Origo fóru fram fimmtudaginn og föstudaginn síðastliðinn. Um er að ræða 24 tíma hakkaþon sem haldið er árlega í fyrirtækinu með það að markmiði að efla nýsköpun og þróa nýjar tæknilausnir.

Starfsfólk Origo fær tækifæri á að vinna í hópum að ákveðnu verkefni sem þau kynna síðan fyrir restina af fyrirtækinu. Það myndast alltaf frábær stemning í fyrirtækinu í kringum ofurhetjudagana og sumir starfsmenn leggja það á sig að vinna allan sólarhringinn að hugmyndinni.

Margar hugmyndir og lausnir hafa fæðst á Ofurhetjudögum Origo í gegnum árin sem síðan hafa þróast yfir í raunverulegar lausnir sem enda loks í vöruframboði. Má þar nefna Tempo sem sérhæfir sig í tímaskráningum í þróunartólinu JIRA en Origo seldi í fyrra 40% eignarhlut sinn í Tempo fyrir 29 milljarða króna.

Á Ofurhetjudögunum í fyrra hrepptu tvær lausnir sigur sem báðar eru væntanlegar á markað. Fyrri lausnin er Vissa þjónustugátt sem stuðlar að bættu aðgengi almennings að sérfræðilæknum . Lausnin kemur á markað á næstu vikum með hudvaktin.is en það er ný þjónusta í fjarlækningum húðlækna. Seinni lausnin er Rúna launavakt sem mun koma til með að færa fyrirtækjum nýjustu launaupplýsingar á markaði, á aðgengilegan og skiljanlegan hátt. Rúna er væntanleg á markað í byrjun næsta árs.

Þróum áfram og breytum leiknum

Þema Ofurhetjudaganna í ár var „Þróum áfram“ en markmiðið er að fá starfsfólk til að þróa lausnir sem breyta leiknum og skapa raunveruleg áhrif. Sigur í keppninni veitir vinningsliðinu montrétt og ofurhetjuskikkjuna, farandbikar keppninnar, ásamt því að Origo styður við áframhaldandi þróun hugmyndarinnar.

Sigurvegararnir í ár á Ofurhetjudögunum var liðið VitalFlow en í teyminu voru Bergþóra Gná Hannesdóttir, Kjartan Hansson, Unnur Sól Ingimarsdóttir, Veigar Þór Helgason og Ævar Þór Gunnlaugsson.

Í dómnefnd sátu þau Freyr Friðfinnsson, verkefnastjóri hjá KLAK Icelandic Startups, Ljósbrá Logadóttir, forstöðumaður vöru- og viðskiptaþróunar hjá Þjónustulausnum Origo og Magnús Björnsson forstjóri Men&Mice.